Во текот на летната туристичка сезона зачестена е појавата на граничните премини ширум Европа наши граѓани да користат патни исправи кои претходно ги пријавиле како изгубени или украдени, а откако ќе ги пронајдат се обидуваат да патуваат со истите, без притоа да го пријават пронаоѓањето во надлежните служби на МВР каде се издадени документите, информираат од министерството за внатрешни работи.
– Со оглед на фактот дека сите патни исправи и лични документи кои се пријавени како изгубени или украдени, претставуваат неважечки документи и истите се внесуваат во базите на ИНТЕРПОЛ, при употреба на овие документи пред надлежни полициски органи насекаде низ светот, истите се одземаат и на граѓаните не им се дозволува продолжување на патувањето во земјата каде се употребени, потенцираат од МВР.
Со цел избегнување дополнителни финансиски трошоци за граѓаните (вадење патен лист во амбасадите на Р. Македонија, пропаднати туристички аранжмани и сл.), од МВР апелираат граѓаните кои претходно ги пријавиле своите патни исправи или лични документи за изгубени или украдени, во случај на нивно пронаоѓање задолжително да го пријават истото во надлежните служби на МВР каде се издадени документите.
OhridNews
