На денешен ден во 1875 во Охрид е роден Методија Патчев, македонски војвода, еден од најпознатите револуционери од пред Илинденското востание на македонскиот народ.
Делото на ТМРО му било над се, а со своите постапки секогаш бил праведен и бескомпромисен. Животот го загубил на 7 април 1902 година во Кадино Село во близина на Прилеп. По опколувањето од турскиот аскер и долгата борба на комитите не им преостанало ништо друго освен да се предадат или да умрат. На повикот од аскерот да се предадат одговориле дека македонски борци не се предаваат.
Со песна, после 24-часовна борба, Методи Патчев и неговите соборци со последните куршуми извршиле групно самоубиство.
Со пригодна програма во организација на Општина Охрид, ОМУ „Методи Патче“ и НУ Завод и Музеј Охрид денес ќе биде одбележан јубилејот 150 години од раѓањето на македонскиот војвода Методи Патче.
Активностите во рамки на програмата започнуваат во 10:30 часот за кога е предвидено положување цвеќе пред спомен бистата на Патче во градскиот парк. Во 11:00 часот во спомен-куќата на Христо Узунов ќе се одржи свечената академија по повод јубилејот.
Во рамки на културно-уметничката програма ќе настапи женскиот хор „Acordis“, по што ќе следи драмска изведба на адаптирани историски факти: „Гласот на револуцијата“ од м-р. Михаил Патчев во изведба на ученици од ОУ „Ванчо Николески“, а предвиден е настап и на учениците од ОМУ „Методи Патче“.
OhridNews
