Секторот за урбанизам и заштита на животната средина при Општина Охрид во соработка со Македонското лимнолошко друштво, во рамки на проектот: “Регистрирање на гнездата на лебедите и нивна заштита во Охридското Езеро со цел одржување на биодиверзитетот” на две локации на брегот на езерото постави информативни табли. Информативните табли со податоци за црвеноклуниот лебед на македонски и англиски јазик се поставени во близина на мостот кај каналот Студенчишта и во населбата Далјан, на плажата пред хотелот “Мизо”.


Проектот кој се спроведува веќе втора година се однесува на црвеноклуниот лебед именуван како “нем лебед”кој живее на Охридското Езеро. Основна карактеристика која го издвојува од останатите лебеди е црвениот клун , во чија основа се наоѓа јасно изразена црна грба. Овој лебед се размножува еднаш годишно, се гнезди од април до мај во гнездо изградено од трски и пердуви на островца сместени на тешко пристапни места и во појас на трска , во близина на брегот или на самиот брег. Минатата година беше извршено маркирање и прстенување на лебедите(родителските парови и подмладокот), а нивното следење продолжува и оваа година.

Во рамки на проектот изработени се и информативни флаери кои на почетокот на учебната година ќе бидат поделени по охридските училишта, а ќе бидат одржани и едукативни предавања како и јавни трибини каде ќе бидат презентирани резултатите од истражувањата и предвидените мерки за заштита на лебедите со цел одржување на биодиверзитетот .

Ohridnews