На Охридското Езеро во лето сообраќаат околу 3500 пловни објекти, а се очекува во претстојната сезона нивниот број да се зголеми. Бројните инциденти во вода во минатото, но и густиот сообраќај на закрчените сообраќајници на копно во шпицот на туристичката сезона ја наметнуваат потребата од формирање на Центар за спасување на вода кој ќе располага со добро обучени мобилни екипи, кои ќе бидат во можност да реагираат во најкус можен рок по воден пат. Овој центар, според упатените, покрај со лекарски тим, треба да располага со специјална опрема за гасење пожар на вода и интервенција при еколошки инциденти.
– Потребно е да се координираат сите обучени екипи на Црвениот крст, Професионалната противпожарна единица и Капетанијата кои заеднички треба да делуваат во случај на несреќа на Охридското Езеро, вели Спасе Прентоски, началник на ТППЕ – Охрид.
Според него тогаш надлежните служби многу поефикасно ќе можат да одговорат на разните предизвици, како што беше потонувањето на бродот „Илинден“, пожар на пловен објект или еколошки инцидент.
Советникот Томислав Тунтев, смета дека безбедноста и заштитата на Охридското Езеро треба да бидат приоритет на локалната и централната власт кои се уште се препираат околу ингеренциите и надлежностите кои во овој момент се во раце на државата.
-Се надевам дека надлежните институции ќе најдат заеднички јазик и ќе се договорат кој е оној што треба да води сметка за конкретни ситуации, за цврстиот отпад, за течниот отпад, за загадувањето какво што имавме неодамна кога по целиот кеј мирисаше на нафта, кој е надлежен за крајбрежјето, кој за стопанисувањето со рибниот фонд и дека ослободени од егоизам и дневна политика еднаш конечно ќе се договориме дека сите заеднички треба да се грижиме за нашата и иднината на нашите деца преку заштитата на животната средина, истакна Тунтев.
Според анализите на Хидробиолошкиот институт нафтата што пред две недели беше испуштена во Охридското Езеро не предизвикала поголемо загадување на крајбрежјето, а покрај најавите на надлежните служби дека одговорните за еколошкиот инцидент најстрого ќе бидат санкционирани, случајот засега се сведе на поднесување кривична пријава против непознат сторител.
