– Ви пишувам бидејќи сум изреволтиран од состојбата во туризмот. Јас сум легален станоиздавач, не е фер некој редовно да си ги плаќа давачките према општината и државата, а некој „на црно“ да си реди гости и притоа ни е директна конкуренција на нас легалните станоиздавачи. Цените кои тие ги нудат се премногу ниски и ние не можеме да конкурираме со нивните цени. Општината и државата не превземаат скоро ништо, а сепак и во нивни интерес е да го решат ова прашање. Вака приватен станоиздавач и се обраќа на Локалната самоуправа во отвореното писмо, што и го испратил деновиве, незадоволен од состојбите во охридскиот туризам.
Легалните станоиздавачи бараат надлежната инспекција да не замижува пред проблемите, туку да излезе на терен и да изврши контрола кај „Охридска банка“, „Автобуска“, „Пошта“ итн. и да провери колку од луѓето што тука нудат сместување, легално работат.
– Доволно е да се фатат 10-на прекршители и строго да се казнат, мерките кои се изречени да бидат објавени во медиумите, па да размислат сите дали би издавале на црно, велат легалните станоиздавачи, кои се надеваат дека надлежните служби ќе прекинат да го игнорираат овој долгогодишен проблем и ќе почнат да ја вршат работата за која ги плаќаат даночните обврзници.
Покрај легалните станоиздавачи од нелојалната конкуренција се жалат и туристичките агенции. Дел од нив во обид да го заштитат бизнисот во кој вложиле милиони денари ангажираа приватно обезбедување пред објектите, бидејќи се случувало гостите да им бидат „однесени“ пред нос.
