Националниот сојуз за планинско спасување на светскиот конгрес на ИКАР во Инсбрук

Претставници на Националниот сојуз за планинско спасување (НСПС) од Македонија учествуваат на годишниот конгрес на Меѓународната комисија за алпско спасување (ИКАР), кој се одржува од 6 до 10 октомври во Инсбрук, Австрија. Дел од Сојузот е и Планинската спасителна служба при Црвен крст Охрид.

Според соопштението на НСПС, собирот обединува повеќе од 1.000 претставници од светската спасувачка заедница, кои разменуваат искуства и се запознаваат со најновите техники, технологии и опрема за планинско спасување.

Програмата опфаќа стручни предавања, работилници и практични демонстрации за копнено и воздушно спасување, лавинско спасување, спасување со кучиња и ургентна планинска медицина. Меѓу темите се употребата на дронови, хеликоптерските операции и медицинското згрижување на повредените.

НСПС од 2023 година е полноправна членка на ИКАР со највисокиот статус на членство – категорија А. Од Сојузот посочуваат дека учеството на конгресот придонесува за унапредување на знаењата и вештините на спасувачите и за зајакнување на меѓународната соработка.

Нашата определба останува јасна – развој на современ, ефикасен и национално организиран систем за планинско спасување во Македонија, усогласен со светските стандарди на ИКАР, наведуваат од НСПС.