Од 27 јуни до 12 јули, Охрид ќе биде домаќин на 44- та по ред Летна школа на меѓународниот семинар за македонски јазик, литература и култура во организација на Унивезритетот Св. Кирил и Методиј- Скопје . На годинешната Летна школа ќе учествуваат 120 учесници од над 24 земји.
Меѓу нив ќе се најдат истакнати македонисти и лингвисти, како што се академиците Ала Шешкен од Русија и Иван Доровски од Чешка, професорите Мачеј Кавка, Ирена Ставова-Кавка и Јан Соколовски од Полска, Волф Ошлис од Германија, Бранко Тошовиќ од Австрија.
Слушателите на Летната школа ќе имаат секојдневни лекторски вежби и курсеви, а и оваа година ќе биде активна преведувачката работилница. По завршувањето на Летната школа, на 14-ти и 15 јули ќе се одржи и 38. меѓународна научна конференција од областа на македонистиката, на која ќе учествуваат осумдесетина научници од земјава и од странство.
Во фокусот на годинашното издание ќе бидат два значајни јубилеја – 150 години од објавата на Зборникот на народни умотворби на Миладиновци и 90 години од раѓањето на Блаже Конески. Покрај тоа, тематски ќе бидат одбележани и други годишнини (за Гане Тодоровски, Петре М. Андреевски, Благоја Корубин, Коле Чашуле). Ќе бидат претставени и активностите и издавачката дејност на научните институти – за македонски јазик, за национална историја, за фолклор и за литература.
