Најмладите охриѓанчиња од градинките, ученици од основните и средни училишта, претставници од локалната самоуправа и бројни граѓани денес одржаа дефиле низ градските улици со порака „Чекориме за безбеден сообраќај“.
– Најмладите но и сите останати на овој начин упатуваат апел до сите учесници во сообраќајот како треба да се грижиме во иднина и да го подигнеме степенот на безбедност.Ова е манифестација која практично значи апел до сите учесници во сообраќајот-возачите на патнички и товарни возила,велосипедистите,пешаците да внимаваме на својата,но и на безбедноста на сите други учесници.Заедно можеме да го направиме она што го посакуваме,а тоа е да го намалиме бројот на случени сообраќајни незгоди, вели претседателот на општинскиот Совет за безбедност во сообраќајот,м-р Стефан Димоски.
Најмладите охриѓанчиња преку низа активности веќе подолг период учат за безбедноста во сообраќајот и како да се однесуваат на улица.
– Вклучени сме во сите вакви настани во соработка со советот за безбедност со цел да ги воспитаме децата уште од најмали нозе како да се грижат за сопствената безбедност и здравје.Сите овеие навики кои сега ќе ги стекнат и научат остануваат како трајна вредност, потенцира директорката на ЈОУДГ „Јасна Ристеска“, Розе Костоска.
Во рамки на манифестацијата во Центарот за култура, се одржа и пригодна програма при што децата преку музика и игра ја пратија пораката до учесниците во сообраќајот да ги почитуваат сообраќајните правила и да ја зголемат сопствената безбедност и безбедноста на останатите.
OhridNews
