Според податоците на Државниот завод за статистика, индексот на цените на мало во мај оваа година, во однос на претходниот месец, изнесува 99,4, а индексот на трошоците на животот 99,7 или 0,3 отсто што е резултат на пониските индекси на зеленчукот за 6,9 отсто, јајцата за 5,4 отсто, свежото млеко и алкохолните пијалаци за 0,3 отсто.
Во мај, намалување на индексите на трошоците на животот е забележано и кај нафтените деривати за 3,6 отсто, течните горива и гасот за 3,5 отсто, телекомуникациските услуги за 1,1 отсто, материјалите за одржување на станот за 0,6 отсто и средствата за образование за 0,5 отсто.
Пораст на индексот на трошоците на животот во мај оваа година, во споредба со претходниот месец, е забележано кај овошјето за 8,9 отсто, рибата за два отсто, преработките од риба за 1,5 отсто, сувото овошје за 0,6 отсто, месото за 0,5 отсто, преработките од месо за 0,4 отсто и безалкохолните пијалаци за 0,3 отсто.
Исто така, пораст на индексот на трошоците на животот е забележано и кај лековите за 2,1 отсто, обувките за 1,3 отсто, садовите и приборот за домаќинствата и туристичките аранжмани за еден отсто, услугите за сместување за 0,9 отсто, предметите за домаќинството и козметичките производи за 0,6 отсто, средствата за хигиена и превозот на патници за 0,5 отсто, облеката, услугите за нега и лична хигиена и храната во ресторани и хотели за 0,2 отсто.
Индексот на цените на мало во мај 2012 година, во споредба со истиот период лани, бележи пораст од 2,8 отсто, а индексот на трошоците на животот бележи пораст од два отсто.
