Според портпаролот на СВР Охрид Стефан Димоски, безбедносната состојба во охридскиот регион е беспрекорна. „Работиме на безбедноста како во самиот град, така и во училиштата во општините Охрид и Дебарца. За разлика од пред 3 години, кога во рамките на образовните центри регистрирани беа 16 прекршоци, оваа година таа бројка изнесува само 3. Заслугата не е само на полициските службеници, туку и на координацијата со советодавната група граѓани.“ – истакна Димоски.
Димоски потенцира дека поставувањето на видео надзор во училиштата, како и присуството на агенциите за обезбедување, ќе придонесат кон намалување на прекршоците во овие установи. „Улогата на видео надзорот и обезбедувањето, се начин како да се спречат учениците кои имаат тенденции за правење на прекршоци. Од страна на педагошките и психолошките служби во школите, се врши едукација за спречување на насилството. Сите овие параметри ја даваат таа клучна бројка, која е значително намалена во текот на оваа година“ – додава Димоски.
Инаку, на средбата беа поднесени информации околу изборот на агенции за физичко обезбедување на училиштата, како и спроведувањето на проектот „Безбедни училишта-хармонична средина“. Овој проект е инициран од министерството за образование, министерството за внатрешни работи, како и мисијата на ОБСЕ во Република Македонија.
