На неодамна распишаниот тендер се пријавиле 13 заинтересирани компании. Една од нив понудила и конкретни производи кои се доставени до надлежните општински служби задолжени за спроведување на постапката. Според одговорните во Секторот за туризам и економски развој, се работи за современи информативни пултови, кои ќе претставуваат придобивка за градот и олеснување за туристите. Тие на информативните пултови ќе можат да добијат разни сервисни информации, од телефонски броеви на институции, до мапи, па дури и менија со состав на храната што ја нудат рестораните и хотелите.
Вакви информативни пултови е предвидено да бидат поставени и во трите Информативни центри на влезовите од градот, чија изградба иако се најавува долго време се уште не е започната.
Тендерот за набавка на информативни пултови предизвика обвинувања на релација Локална самоуправа – ВМРО ДПМНЕ. Според првите набавката на дигиталните информативни пултови е оправдана, а вторите сметаат дека тоа е економски неоправдан потег и неодговорно однесување во време на криза.
