Министерството за економија подготвува оглас за избор на нов раководител на одделението на Државниот инспекторат Охрид, кој се очекува да биде објавен во текот на оваа недела.
Како што потенцираат од министерството, на огласот кој ќе трае осум дена ќе имаат право да се пријават сите кои ги исполнуваат наведените услови , а до назначувањето на новиот раководител, на оваа позиција во Охрид останува сеуште актуелниот раководител Ѓорѓи Бошалески.
Неодамна беше најавена и промена на раководната позиција на Управата за имотно правни односи во Охрид, чиј вршител на должност беше Спасе Лечоски.
Како што беше потенцирано од владеачката ВМРО- ДПМНЕ, промените доаѓаат по извршените согледувања на успешноста на работата на функионерите кои претходно биле именувани.
-Ова покажува дека ВМРО–ДПМНЕ е партија која има и храброст и капацитет постојано да се менува, да се подобрува, се во насока на одговор на потребите и барањата на граѓаните како наше основно начело во работата. Во изминатиот период ВМРО-ДПМНЕ имаше можност да ја согледа успешноста на работата на функионерите кои беа именувани и врз основа на тоа да донесе одлука за промени во одредени области.- изјави неодамна членот на највисокото партиско раководство на ВМРО-ДПМНЕ, Никола Тодоров.
Т.К.
