Под мотото “Неговите арии”, викендов, во Македонската опера и балет ќе се одржи четвртиот по ред меморијален концерт во чест на македонската музичка легенда Тоше Проески.
Како што информираа организаторите, публиката ќе има можност да ги слушне неговите најголеми поп-хитови, но во едно поинакво светло, во нов оркестарски аранжман и изведени од најголемите оперски пејачи од земјава и Балканот, заедно со оркестарот на Македонската опера и балет, а под диригентската палка на Саша Николовски-Ѓумар.
Средствата за организација на концертот ги обезбедија Министерството за култура и Фондацијата „Тоше Проески“. Во продажба се пуштени 600 влезници, колку што е капацитетот на МОБ. Цената на билетите е 1.200 денари, а дел од приходот е наменет за опремување на Клиниката за детски болести.
OhridNews
