Во текот на наредните две години неколку охридски села и улици ќе добијат нови водоводни системи. Ова е предвидено во рамки на „ Развојната програма за изградба на системи за водоснабдување за период од 2016-2018 година “, која беше усвоена на последната седница на Советот на општина Охрид.
Според планираното, со средства од општинскиот буџет ќе се финансира изградбата на нова водоводна линија во селата Пештани, Помоље, Лескоец, Горно Лакочереј и Велгошти, а се очекува нов водоснабдителен систем да добијат и селата Вапила и Ливоишта.
Освен селските населби, нови водоводни линии ќе бидат изградени и во Урбаните заедници „Гоце Делчев“ и „Радојца Новичиќ“, а според планираното нова водоводна мрежа ќе добијат и улиците „Абас Емин“, „Јане Сандански “ и „Ванчо Питошески“.
Исто така во Развојната програма е предвидена и реконструкција на водоводната мрежа на улиците „Андон Дуков“, „Аџи Мустафа“, „Мирче Ацев“, „Будва“ и на кеј „Македонија“, а планирано е да се изврши и реконструкција на системите за наводнување на улицата „Железничка“ и на кружните крстосници.
За реализација на двегодишниот план за изградба и реконструкција на системите за водоснабдување потребни се околу 510 илјади евра или точно 31.300.000 денари, а од Буџетот на општина Охрид за тековната 2016 година планирано е да бидат издвоени околу 220 илјади евра или точно 14.000.000 денари.
OhridNews
