-Се случува туристите кои се сместени во колективните станбени згради, често може да се тоа и малолетни лица, воопшто да не знаат кој е сопственик на станот во кој престојуваат. Мајката го нашла станот им го дала клучот преку трето лице, едни ќе заминат па ќе го предадат клучот, па други доаѓаат.-посочува Виолета Тунтева – овластен инспектор по туризам и угостителство.
Од Општинскиот инспекторат објаснуваат дека согласно законот само роднини до прво колено се ослободени од плаќање на туристичка такса која чини 40 денари, додека сите останати подлежат на оваа давачка. Доколку бидат затекнати непријавени гости на сопствениците на становите им се изрекува глоба од 300 евра, но голем број прекршители на законот поминуваат неказнето затоа што на територијата на општина Охрид работат само двајца инпектори по туризам и угостителство, а во градот има околу 10.000 станови и помали студија и 60-на хотелски капацитети. Голем проблем исто така претставуваат и таканаречените диви агенции кои земаат се поголем дел од пазарот од легалните агенции, поради што тие трпат огромни штети.
– Тоа мора да се признае дека е така, иако е мал бројот сепак постојат диви агенции во Охрид. Тие држат клучеви од по неколку станови, тоа претставува проблем затоа што тие агенции ги издаваат овие станови без да плаќаат туристичка такса и без евиденција на гости, поради што апсолутно не може да се утврди точната бројка на туристи кои го посетуваат Охрид.-изјави Танас Танасоски, раководител на Општинскиот инспекторат.
Проблемот со регулирање на престојот и плаќањето на туристичката такса според градоначалникот на Охрид е невозможно да се надмине без системско решение, односно посебен закон со кој Охрид ќе се издвои од другите општини во земјата. Тој закон треба да го донесе Парламентот посочува Петрески, кој предлага оданочувањето да се врши на граничните премини и аеродромите или пред влегување на туристите во градот.
– Секој кој има стан во Охрид, а местото на живеење му е во друго место треба да плаќа годишен паушал и со тоа би се решил еден проблем. Друг проблем се услугите за користење на јавните површини. Тоа може да се реши со поставување рампи на трите влеза во градот, бидејќи Охрид е заштитено подрачје од УНЕСКО треба да се плаќа соодветна влезница во тоа заштитено подрачје. – смета Петрески.
Во првите 6 месеци од оваа година во Охрид се остварени 124.000 ноќевања на странски туристи што е за 17.4 проценти повеќе од минатата година, но драстично е намален бројот на гости во приватното сместување. И покрај тоа Општинскиот инспекторат очекува да биде остварен зацртаниот приход од туристичка такса од 20 милиони денари, но оваа сума може и треба да е повисока доколку се создадат и применат неопходните механизми за контрола на привремениот престој.
