Премиерот Зоран Заев за денеска напладне најави нова лидерска средба во помал состав. Тоа е на барање на лидерот на ВМРО-ДПМНЕ, Христијан Мицкоски, кој синоќа ја напушти средбата во Клубот на пратеници. Мицкоски побара средбата да биде со четворицата лидери на најголемите партии, а не во проширен состав.
Заев објасни дека референдумот ќе биде консултативен и објави како ќе гласи прашањето: Дали сте за членство во ЕУ и НАТО со прифаќање на договорот со Грција? Тој рече дека Мицкоски се однесувал неодговорно и несериозно како кон политичките претставници кои останале докрај на средбата, но и кон граѓаните.
Тој појасни дека за конечна се смета одлуката ако на референдумот излезат најмалку 50 отсто од вкупниот број на запишани избирачи во Избирачкиот список.
„Без разлика на карактерот на референдумот, одлуката се смета за успешна во ваков случај. И се отвори дебата дали да биде консултативен или обврзувачки. Консултативен е кога ние сакаме да ги консултираме нашите сограѓани и потоа ги носиме одлуките, како што е случајот со одлуките за промена на Уставот“, рече Заев.
Претседателот на ВМРО-ДПМНЕ ги повтори ставовите на партијата – усвојување на Законот за финансирање на политичките партии и измените на Законот за Влада каде што ќе се регулира концептот на техничката влада по пржинскиот модел, па дури потоа формирање на ДИК.
Заев ја свика лидерската средба откако ВМРО-ДПМНЕ го блокира формирањето на ДИК. За првпат беа свикани лидерите на политичките партии кои имаат повеќе од еден пратеник во Собранието.
OhridNews
Макфакс
