Градоначалникот Никола Бакрачески, утрово, го посети новото гинеколошко одделение при Општата болница каде вчера беше родено првото бебе по две и пол годишна пауза поради реконструкцијата на објектот.
Посакувајќи добро здравје, Бакрачески во име на локалната самоуправа, на мајката Марија Арнаудова и подари чек во вредност од 6000 денари.
Градоначалникот упати честитки и до втората родилка која се породи на новото гинеколошко одделение, а на персоналот во болницата му посака успешна работа .
-Имавме можност да присуствуваме на еден радосен чин и да честитаме за првото новородено дете по пауза од две години во Охрид. Радува тоа што Охрид доби модерно опремена болница и јас сум задоволен што сум градоначалник на град кој што ја има најсовремената болница во јавното здравство. Се надевам дека во наредниот период ќе има растечки тренд на бројот на породувањата во охридската болница со оглед на условите кои ги нуди таа бидејќи очекувам тука да доаѓаат родилки не само од соседните градови, туку и од Албанија.-изјави градоначалникот Бакрачески.
Според проценките, во новото гинеколошко одделение на општата болница ќе се вршат околу 600 породувања годишно.
OhridNews
