Обилните врнежи од дожд и снег предизвикаа поплави во повеќе населби во Охрид. 

На улицата „Стив Наумов“ во населбата Лескајца поплавени се имоти и повеќе индивидуални куќи. Водата е навлезена во домовите, а жителите се обидуваат да спасат што може да се спаси.

–Вода извира од шахтите и ги поплавува куќите.-ни изјави Таир Сабри, чија куќа е една од многуте во Охрид, погодена од поплавите.

Тој вели дека вака е веќе три години и дека и покрај бројните поплаки, иницијативи и ветувања, надлежните се уште не го решаваат проблемот.

-Пријавивме на 195, ни беше кажано дека Колекторот е ставен ви функција и дека состојбата ќе се нормализира, но водата се уште извира од шахтите и ги поплавува нашите имоти, а надлежните никаде ги нема.-вели Сабри.

Поплавени се повеќе куќи и во населбата „Билјанини извори“, каде жителите со пумпи се обидуваат да се спасат од водената стихија.


Шахтите се излеаја на ул. „Галичица“

Граѓани информираат за поплави и на улицата „Дејан Војвода“, каде исто така се излеваат шахтите.

Управата за хидрометеоролошки работи соопшти дека попладне ќе има делумно разведрување, врнежите ќе бидат поретки и ќе дува засилен, повремено силен (над 70км/час) југозападен ветер. 

OhridNews