Вистинска драма утрово се случуваше на улицата „130“ во населбата Радојца Новичиќ. Околу 8 часот и 40 минути пожарот кој изби во една од куќите, целосно ја уништи кровната конструкција на објектот при што причинета е огромна материјална штета.
Како што информираат од Противпожарната служба, од соседството било пријавено дека гори оџак од приватна куќа. Целата мобилна единица се упатила на лице место, при што е утврдено дека зафатена е целата кровна конструкција. На помош биле повикани сите возила и вработени од Противпожарната служба, а околу 16 пожарникари неколку часа се бореле со огнената стихија.
Командирот на Противпожарната служба од Охрид, Спасе Прентоски, истакна дека со присебноста на пожарникарите спречена е поголема катастрофа. „Пожарот е веќе изгаснат , но предизвикана е голема материјална штета. И во овој случај како и во оној кој се случи минатата недела во стариот дел од градот , пожарот избил поради неисчистен оџак. Станува збор за нова куќа, и за жал изгорен е голем дел од објектот.“ – информира Прентоски.
Од оваа служба упатуваат апел до граѓаните редовно да ги чистат своите оџаци, со цел спречување на вакви настани кои можат да доведат до несакани трагедии. Во двата случаи на опожарени киќи во само една недела, за среќа нема човечки жртви.
О.Т.
