Одронот на патниот правец Дебар- Струга кај браната Глобочица, е целосно расчистен од страна на екипи на Македонија пат, информираат од АМСМ. Претходно поради одронот на патниот правец Дебар- Струга, кај браната Глобочица, сообраќајот се одвиваше по една коловозна лента.
Според последните информации, сообраќајот на сите магистрални и регионални патни правци низ државата се одвива непречено, во зимски услови, по претежно влажни коловози. По клисурите и усеците можна е зачестена појава на поситни одрони, посебно на патните правци Маврово-Дебар-Струга, Д.Капија-Удово и Катланово-Велес. Дежурните екипи на ЈП Македонијапат се на терен, редовно ги контролират и одржуваат проодни сите патни правци. Внимателно возење се препорачува и на патниот правец Демир Хисар-Кичево поради голомразица на коловозот.
