Професионалниот војник осомничен за тројното убиство во Злетово, е пронајден обесен во едно од околните бачила. Полицијата потврди дека беживотното тело му припаѓа на 40 годишниот Драган Манолев, кој утринава во убиствен поход уби тројца жители на Злетово. Пред да му заврши смената, вооружен со службената полуавтоматска пушка од кумановската касарна, се упатил кон Злетово. Цел му бил пријателот на неговата сопруга, со која биле во фаза на развод.
– Осомничениот првин тропнал на вратата од куќата, која ја отворил 51 годишен жител на Злетово и во него испукал неколку куршуми, вели Гордана Панајотова од СВР Штип. Методи Димитровски (51) бил првата жртва, а подоцна ги убил и Илија и Јана Михаилови, по што заминал во својот дом во Злетово. Таму го пронашол и братот на неговата сопруга, со кого физички се пресметал, а откако му било одземено оружјето, се дал во бегство во ридовите над Злетово, каде подоцна е пронајден мртов.
Драган Манолев бил учесник во конфликот од 2001-та, а според неговите соседи претстојувал и во Авганистан.Тој неколкупати е пријавуван во полиција поради физичко и психичко малтретирање на сопругата и нејзините родители, а против него имало и кривични пријави. И покрај тоа, од АРМ бил прогласен за психички здрава личност и му било дозволено да носи оружје.
OhridNews
извор Телма
