Четири засега непознати лица, утрово околу 8 часот на улицата „Дејан војвода“ извршиле разбојништво врз сопственик на менувачница од Охрид, при што му ја одзеле торбата во која имало поголема сума пари.
Како што соопшти полицијата, разбојниците се движеле со патничко возило „Фолксфаген-џета“ со кичевски таблици и директно го удриле и повредиле 48-годишниот сопственик на менувачница од Охрид по што еден од нив, излегол и од него одзел платнена торба во која, според кажувањето на повредениот, имало 120.000 евра. Повредениот е префрлен во болницата „Св.Еразмо“ во Охрид.
Разбојниците веднаш по нападот, со истото возило се упатиле кон излезот на Охрид, кон магистралниот пат Охрид-Кичево. На потегот помеѓу селата Требеништа и Мешеишта, од страна на полициските службеници, пронајдено е запалено патничкото возило „Фолксфаген-џета“ кое го користеле разбојниците.
СВР Охрид презема интензивни мерки за пронаоѓање на крадците.
Ова е второ рабојништво во Охрид за кус период. Завчера вечерта вооружени разбојници ја ограбија златарата „Голд“ во центарот на Охрид, од каде однеле златни предмети во вредност од 100.000 евра.
