Охриѓанецот Христијан Ристески го објави првиот сингл „Coming Home“ од својот дебитантски џез албум „Waters Dance“, проследен со видео спот дело на Даниел Јовески.
„Waters Dance“ е авторски џез проект на Христијан Ристески, саксофонист и кларинетист кој моментално е на мастер студии на Џез институтот во Грац, Австрија. Албумот претставува лична музичка приказна во која се преплетуваат неговите искуства, различните музички влијанија и патот што го гради како уметник.
Првиот сингл „Coming Home“ носи лична приказна инспирирана од чувството на враќање и поврзаноста со неговото потекло, но од нова перспектива – низ искуствата и промените што го обликуваат неговиот музички пат.
Албумот е снимен во октомври 2025 година во ArteSuono Studio во Удине, Италија, со звук-продукција на Stefano Amerio, добитник на Grammy Award. На проектот настапува Христијан Ристески Квартет, составен од Христијан Ристески, пијанистот Марко Црнчец од Словенија, контрабасистот Хрвоје Краљ од Хрватска и тапанарот Крис Смит од САД.
Христијан Ристески е добитник на наградата за најдобар млад џез-музичар во Македонија за 2025 година на Jazz Factory Festival („Гоце Димитровски“) и еден од младите македонски џез музичари кои својот уметнички пат го развиваат на европската сцена.
„Coming Home“ е првата композиција од претстојниот албум „Waters Dance“, кој ќе биде објавен на 2 октомври 2026 година. Со оваа песна, Ристески ја започнува приказната за својот прв авторски албум, во кој ги спојува досегашните искуства и новите музички хоризонти.
OhridNews
