Минатата недела нашата сограѓанка Гордана Ангеличин-Жура успешно ја одбрани својата докторска дисертација по социологија на Хумболдтовиот Универзитет во Берлин, добивајќи највисоки почести за трудот, а воедно стекна и номинација за најдобар докторски труд на ниво на целиот универзитет.
Со ова, таа станува една од ретките охриѓани што постигнале ваков успех на најстариот универзитет во Берлин, основан во 1810 година, дом на најголемите германски мислители како Фихте, Шопенхауер, Маркс и Енгелс, како и физичарите Алберт Ајнштајн и Макс Планк. Воедно, 29 добитници на Нобелова награда биле студенти при Хумболдтовиот Универзитет.
Гордана Жура, која е ќерка на нашиот познат историчар на уметност Гоце Жура, со својата докторска титула стекнува специјализација во областа на социологија на миграција и социјални нееднаквости, фокусирајќи се на влијанието на глобализацијата врз високото образование меѓународно и процесите поврзани со овој феномен што влијаат врз класни разлики.
Темата ја има работено под менторство на познати германски и шведски менторки, познати експерти од оваа област. Освен тоа, таа е и магистер по интеркултурна комуникација, преведувач и одличен познавач на неколку светски јазици. Во рамки на своите квалификации и научна работа, има патувано во огромен број на земји, и освен во Германија, има живеено во САД и Аргентина.
Покрај трасирањето на својот професионален пат, Гордана Жура секогаш активно работела и на афирмирањето на делото на нејзиниот татко, сега покојниот научник Гоце Жура. Има служено како преведувач на многу од неговите дела и трудови, автор е на книгата „Времеплов на научните истражувања на мојот татко“, и постојано продолжува да пишува за неговите достигнувања. Преку својата работа, и афирмацијата на работата на нејзиниот татко, Гордана успешно ги претставува Охрид и Македонија во целиот свет.
OhridNews
