Вкупно 98 ученици од 17 државни училишта се дел од јубилејните 40-ти Државни натпревари на електромашинските и сообраќајните училишта кои се одржуваат денеска и утре во ОЕМУЦ „Свети Наум Охридски“.
Директорот на училиштето Сашо Недески на свеченото отворање ја потенцираше важноста на дуалното образование, додавајќи дека резулатат на успешноста на моделот на дуалното образование е неговото ширење во скоро сите училишта во државата, за да денес државните натпревари комплетно се организираат за учениците кои наставата ја следат во дуалното образование.
Посебен акцент во овој вид на образование е ставен на практичната настава и соработката со компаниите. Од тие причини за првпат после подолг период натпреварот се реализира во два дена каде првиот е теоретскиот дел, а вториот практичниот дел каде учениците ќе можат да ги покажат своите знаења и вештини стекнати во компаниите каде се реализира овој дел од наставата, рече Недески.
Натпреварите се организираат под покровителство на Општина Охрид, а во обраќањето градоначалникот Кирил Пецаков истакна дека ваквите настани се од исклучителна важност за продлабочување на соработката помеѓу училиштата и размена на искуства помеѓу учениците.
Ова училиште е еден од позитивните примери, каде што веќе успешно функционира системот на дуално образование, како еден вид јавно-приватно партнерство помеѓу стручните училишта и компаниите. Со тоа на компаниите им се обезбедуваат квалификувани работници со соодветни вештини, а учениците имаат можност да бидат обучувани директно во компаниите и во реални работни околности. Токму затоа локалната самоуправа, во текот на изминатиот период реализираше низа инвестиции во објектите на училиштето, со што значително ги подобривме условите за настава. Ваквите инвестиции континуирано ќе продолжат и во иднина, не само во ова училиште, туку и во сите основни и средни училишта во нашата општина, рече Пецаков.
Напредокот на општините во современи услови не може да се замисли без локален економски развој, потенцираше Пецаков, додавајаќи дека успешното реализирање на овој концепт подразбира создавање поволна клима за деловни активности и инвестирање.
Еден од најважните предуслови за развој на индустријата и бизнисот секако е квалификуван и стручен кадар, кој ќе може продуктивно да одговори на потребите на пазарот за работна сила. Можностите за вработување, добрите и платени работни места се основниот предуслов за младите луѓе да можат да ја гледаат својата иднина тука, во родните места, со што значително би се сопрел процесот на иселување. Поради тоа сите заедно ќе мораме да продолжиме да се залагаме и да работиме за осовременување на образовниот процес и да ја поддржуваме секоја напредна новина во рамки на наставните програми, истакна Пецаков во своето обраќање.
Натпреварите ќе се одвиваат во различни образовни профили од електротехничките, машинските и сообраќајните струки, а паралелно ќе се одржи и натпревар во трудови каде учениците ќе ги презентираат свои проекти.
OhridNews
