Охрид деновиве е домаќин на работилница посветена на иницијативата за воспоставување на Прекуграничен биосферен резерват Охрид – Преспа, на која се расправа и за текот на процесот на номинирањето на регионот за заштитен биосферен резерват на мапата на УНЕСКО.
Дејан Пановски од Билатералниот секретаријат на комитетот за управување со сливот на Охридското Езеро, иницијатор на номинацијата, вели дека Проектот е подржан од страна на македонските и албанските власти, како на локално и централно ниво.
– Проектот сега влегува во фаза кога заедно со УНЕСКО ќе треба да ја подготвиме номинацијата, со очекување истиот да биде прогласен како заштитен биосферен резерват на УНЕСКО. Нашата цел е преку прогласувањето резерватот да ги заштити природните реткости во своите граници, но и да промовира нови туристички вредности на Охрид и Преспа, како и вредности што ќе придонесат за негов економски развој, вели Пановски.
Најавува дека паралелно со процесот на прогласувањето на регионот за биосферен резерват, ќе продолжат и активностите за развој по зони, односно со утврдување на деловите на резерватот што ќе бидат прогласени за урбани како и зоните што ќе бидат под целосна заштита. Тоа значи дека се она што се јавува како заштитено подрачје во регионот , истото ќе биде ставено под капа на УНЕСКО.
Апликацијата што ќе биде подготвена за воспоставување на прекуграничен биосферен резерват Охрид – Преспа, ќе биде испратена во УНЕСКО и МАБ-комитетот од проектот на „Човек-биосфера“ на УНЕСКО, од каде се очекува позитивен одговор и прогласување на регионот за заштитен биосферен резерват. Од моментот на прогласување на регионот за прекуграничен биосферен резерват се очекува почеток на реализација на серија проекти насочени кон унапредување на резерватот и негова туристичка промоција. Самото статусот – биосферен резерват заштитен од УНЕСКО овозможува формирање соодветни финансиски инструменти насочени кон негов оджлив развој.
На работилницата учествуваат околу 200 учесници, меѓу кои владини претставници, претставници на меѓународни и невладини организации и останати заинтересирани субјекти.
