По претставувањето на можностите и потенцијалите што ги нуди Охрид за влез на странски инвестиции и бизнис климата во Охрид и Македонија, на средбата во Македонската црква Свети Илија, Македонците од Квинбиен најмногу се интересираа за сигурноста на нивниот капитал што би го вложиле во Охрид, цените на земјиштето и станбениот простор, можноста за изградба на објекти на крајбрежјето и плажите, инфраструктурата во градот и периферијата, давачките кон градот и државата и поволностите што им се нудат за вложување на капиталот кај нас.
Македонците во Квинбиен ги кажаа нивните искуства од престојот во Охрид и посочија одредени проблеми и недостатоци кои според нив треба да се надминат за да се привлечат туристите и инвестициите во Охридскиот регион, при што беше посочено дека еден од клучните фактори е подобрата авио поврзаност со Охридскиот аеродром. На прашањата одговори дадоа претставниците на општина Охрид, а дискусијата продолжи во неформалните разговори во црковниот двор. Не изостанаа политички прашања и провокации, што мина во духот на слободното изразување на мислењето и искажување на ставовите од Македонските иселеници и претставниците на општина Охрид.
Делегацијата од Охрид беше примена од локалната власт во Квинбиен, каде советник во градскиот совет е Величе Трајаноски, Македонец од Охридско,кој е избран како независен кандидат за советник. Во оваа општина,каде има 50 илјади жители,веќе има три генерации Македонци присутни тука од пред 100-тина години. Тие сега се силно гласачко тело, имаат свои бизниси,работат во државните институции и администрацијата, Македонскиот јазик и веронауката се учат во основно училиште, има Македонска црква, Културно уметничко друштво – Разиграна Македонија што ќе учествува на годинашниот Балкански фестивал во Охрид, Македоснки фудбалски клуб и пензионерско друштво.
Делегацијата од Охрид го посети и градот Голбурн, што се наоѓа на 100-тина километри од Канбера. Таму имаше средба со градоначалничката Керол Џејмс и генералниот менаџер Крис Бери, и со единственото Македонско семејство во оваа општина на Охриѓанецот Зоран Неданоски. Првите луѓе на Голбурн,мирно и гостопримливо градче со повеќе нации, убави цркви, модерни технологии на производство и познати спортисти, беа импресионирани од убавините на Охрид кој беше претставен во општината. Тие ја прифатија поканата да го посетат нашиот град и да се направат првите чекори за соработка особено на полето на културата и туризмот. Градоначалничката Џејмс изрази задоволство што одблизу го запозна градот од каде потекнува Неданоски,кој веќе 13 години е добар граѓанин на Голбурн,каде тој работи како менаџер, со што симболично се потврди дека доволно е само едно добро семејство меѓу жителите за да се воспостави пријателска релација со еден далечен град како Охрид, од што може да потекне поголема соработка во иднина.
