Општина Охрид преку Одделението за Локален Економски Развој на крајот од Јануари, аплицираше со Предлог проект во рамките на Програмата на Европската Унија “Европа за граѓаните”. Апликацијата се однесува на збратимувањето на градови и средби на нивните граѓани.
Покрај Општина Охрид, како партнери во овој Предлог проект се појавуваат градови од Шведска, Франција, Германија, Полска и Словачка. Водечки партнер на проектот е Општина Птуј од Словенија.
– Со оваа Општина од Словенија имаме соработка од 2005 год. и заедничкото аплицирање за еден ваков европски проект, претставува само логичното продолжение на одличната соработка помеѓу Општина Охрид и Општина Птуј и унапредување на таа соработка.
Исто така ова е прекрасна можност за промоција на Охрид во останатите земји- (партнери) на проектот, како и промоција на европските вредности и европската идеја, зближување на граѓаните од различни европски држави и размена на искуства во различни области, велат од локалната самоуправа.
Потенцираат дека од особено значење за општината е европското искуство и стандарди од останатите партнери во проектот, посебно од членките на Европската Унија.
