Како што за OhridNews изјави претседателот на советот, Душко Јаковчески, за најлудата ноќ ќе биде дома, а подоцна ќе излезе на градскиот плоштад каде е предвидена богата забава со познати музички ѕвезди.
Во домашен амбиент новата 2013 година ќе ја дочекаат и советниците Љупчо Настоски и Дејан Паноски.
– После една година исполнета со мнгу активности, новогодишните и божиќните празници ќе ги прославам дома со семејството, од каде многу често отсуствував поради бројните работни обврски, вели Паноски.
– За новогодишната вечер ќе бидам дома со моето семејство, а потоа ќе одиме на градскиот плоштад. Сега е кризно време, семејниот буџет е намален, па затоа е најдобро да се слави во домашен амбиент, изјави советникот Настоски.
Советникот Јоне Станкоски, новата година ќе ја прослави со своето семејство кое од неодамна е збогатено со уште еден член, неговиот неодамна роден син.
– Големо задоволство ми е што новата година ќе ја дочекам со сопругата и со синот. Посакувам идната година да биде исполнета со здравје, побериќетна и да гледаме што повеќе среќни луѓе, додава Станкоски.
Дел од советниците сепак се одлучија најлудата ноќ да ја поминат во некое од кафулињата или рестораните во градот.
– Ќе славам во Охрид со друштво. Очекувам дека ќе има голем број гости и јас би сакал новата година да ја дочекам во весела атмосфера со моите пријатели, но и со гостите кои ќе пристигнат од соседните земји, вели Тунтев.
Градоначалникот Александар Петрески, традиционално за дочекот на 2013 ќе биде на градскиот плоштад каде се очекува забава до раните утрински часови.