Централната и локалната власт ги игнорираат бројните инциденти кои се случија во водите на Охридското Езеро изминатите неколку години и не преземаат конкретни мерки за подобрување на безбедноста во водниот сообраќај. Поради несоодветните локации кои општината ги понудила и некомплетна документација, Министерствиото за транспорт деновиве го одбило барањето на Црвениот крст за формирање Оперативен центар за безбедност на вода.
– Иако градот располага со над 170 обучени спасувачи и специјални тимови, нив нема кој да ги координира. Тоа за жал се забележа и при потонувањето на бродот „Илинден“ кога акцијата на спасителите беше некоординирана, вели Сашо Точков од Црвениот крст.
Точков апелира до надлежните од општината и ресорното министерство да комуницираат меѓу себе за да се реши ова приоритетно прашање за безбедноста на капачите и учесниците во сообраќајот на Охридското Езеро.
Црвениот крст најави дека кон крајот на месец јули во функција ќе биде ставен специјален брод – Амбуланта, кој ќе интервенира секаде каде тоа ќе биде неопходно. Од Црвениот крат сметаат дека потребата од еден ваков пловен објект на Охридското Езеро е голема поради сообраќајниот хаос што во туристичкиот шпиц владее на ривиерата, што пак го отежнува движењето на амбулантните возила на брзата помош.
