Охриѓани со шут затрупаа вреден археолошки локалитет

Еден од највредните археолошки локалитети откриени во охридскиот регион е затрупан со шут и градежен отпад кој со години се фрла над остатоците од историското минато кои беа пронајдени кај клучката на влезот од Охрид. Според археолозите се работи за добро сочуван локалитет, кој допрва треба да биде детално истражен , но поради несовесниот однос на граѓаните тој денес речиси и да не се забележува.

– Кај клучката каде сега за жал и голем срам се фрла градежниот шут од изградбата на куќи и згради во Охрид, се покри еден од најатрактивните и најсочуваните објекти во охридскиот регион. Тоа  најверојатно се јавните терми на регионот или Вила Рустика која е со атрактивна архитектура, чии подови целосно се зачувани со мозаична подлога, чии ѕидови се зачувани во висина од 2, 5 метри на кои се гледаа и прозорците, но тие  денес се трупаат со шут и отпад, изјави археологот Владо Маленко, кој неодамна во емисијата „Охридски разговори“, што се емитува на OhridNews, зборуваше меѓу другото и за овој проблем. 

Откриени, а недоистражени археолошки локалитети кои исто така се загрозени од човекот има и во Љубанишко поле кај Св. Наум. Тие според археолог Маленко се од исклучително научно значење и  можат да придонесат во откривањето на тајната каде се наоѓал древниот Девол каде дејствувал Св. Климент Охридски.

Г. Момироски