Претстојниот викенд , се очекува да започне шпицот на главната туристичка сезона, за која се очекува дека ќе биде една од најуспешните. Наместо да се вклучи во позитивна туристичка кампања, ВМРО – ДПМНЕ , преку нивниот Општински комитет во Охрид, секојдневно ја тормози јавноста со издавањето на паркинзите под концесија и решавањето на сообраќајниот хаос во централното градско подрачје, реагираат од Локалната самоуправа.
-Мораме да ги предупредупредиме граѓаните , да не се вклучуват во ваквите ситни и валкани политички игри и омаловажување на сопствениот град. Ова е особено важно , зошто за утре , според наши сознанија, некои самонаречени заштитници на граѓанските права, закажуваат протести. Уште позагрижувачки е што попладнево низ Охрид се делеа и флаери за учество на протестите-стои во соопштението од Кабинетот на охридскиот градоначалник испратено до медиумите вечерва.
Оттаму велат дека организаторите на протестите, тешко ќе можат да им објаснат на туристите зошто протестираат, бидејќи тие знаат дека секаде во светот паркирањето, особено во централните градски подрачја се наплатува.
-Во ОК на ВМРО- ДПМНЕ треба да знаат дека оние кои живеат во централното градско подрачје гаражите не требало да ги пренаменуваат во деловни простори, а оние кои работат во чаршијата, барем за време на главната туристичка сезона , паркинг местата да им ги отстапат на туристите. Граѓаните, за разлика од политикантите од ВМРО- ДПМНЕ, знаат да бидат добри домаќини и да ги почитуваат гостите, зошто од туризмот илјадници охриѓани, во овие тешки времиња на сиромаштија пополнуваат, дел од речиси празниот семеен буџет, стои со соопштението.
OhridNews
