Не е прв пат Либерално-демократската партија од Охрид и нејзиниот претседател, да се служат со инсинуации, лажни обвинувања и конструкции, себеубедувајќи се во правилноста на своите постапки. Веќе стана препознатлива празната политичка реторика на советникот Дејан Блажески и безидејноста во однос на активностите на локалната самоуправа. По кој знае кој пат, Блажески се зафаќа со проектот – лизгалиште, кој од граѓаните беше оценет како полн погодок, а за неговата легалност јавноста беше во детали информирана. И денешното соопштение не е различно од досегашниот начин на изнесување невистини во континуитет, без притоа да се има било каков аргумент како поткрепа на своите банални соопштенија, се вели во реакцијата на општина Охрид, по повод денешното соопштение ЛДП Охрид дека договорот за лизгалиштетот се уште не е доставен.
„Разбирлива е нервозата и видлив е стравот на Дејан Блажески од соочување со правдата, заради изнесување лажни обвинувања и клевети, но и тој и политичката партија на која и припаѓа ќе мора да се соочат со тежината на јавно изкажаниот збор.“ – велат од општина Охрид.
Оттаму додаваат дека законитоста и транспарентноста се основните постулати на кои се темели сегашното функционирање на општина Охрид.
„Тоа е тешко разбирливо за охридските либерал-демократи и нивниот претседател, имајќи предвид начинот на кој тие со своите коалициски партнери, надвор од сите логики и законски норми, 8 години практикуваа власт во општина Охрид. За сите досегашни обвинувања околу начинот и постапката на поставување на лизгалиштето на градскиот плоштад, сега на претседателот на ЛДП од Охрид, дадена му е можност своите тврдења да ги докаже пред судските институции и таму да ги изнесе сите обвинувања со кои веќе два месеци ја замајува охридската јавност.“ – додаваат од општина Охрид.
OhridNews
