Струшката локална самоуправа преку јавно соопштение вчера побара од физичките и правните субјекти кои се занимаваат со угостителска дејност за сместување на туристи во Струга, редовно да ја плаќаат туристичката такса.

Од таму информираат дека според Законот за такса за привремен престој, сместувачите се должни да платат туристичка такса по лице за остварено ноќевање, како за домашните така и за странските туристи.

-Износот на туристичката такса зависи од категоријата на туристите, според тоа некои се ослободени од плаќање такса, за друга категорија има олеснување и износот е 10 денари по лице за ноќевање, додека за сите други категории туристичката такса изнесува 40 денари. Средствата од туристичка такса треба да се платат до 15-тиот ден во тековниот месец, за претходниот месец, пишува во јавното соопштение објавено на Веб-страницата на општина Струга.

Во него се нагласува дека глобата за непочитување на плаќањето на туристичка такса за правните лица се движи од 2.000 до 4.000 евра во денарска против-вредност додека за физичките лица е пропишана казна од 600 евра.

OhridNews