Осуди и протестни ноти за палењето на македонското знаме и инцидентите што се случија деновиве во Тирана, стигаат од сите страни. Македонското друштво „Илинден“ од главниот град на нашиот западен сосед, испрати соопштение во кое најостро ги осудуваат овие нецивилизирани акти на поединци во Албанија.
Од ова друштво истакнуваат дека треба да се градат искрени и пријателски односи помеѓу двете земји. „Згрозени сме од овој вандалски чин за кој нема место на тлото на Европа. Лесно и непромислено е да се запали знамето на соседот, но треба храброст за да се изградат повторно пријателски односни меѓу двете земји“ – се вели во соопштението.
Инаку, инцидентот се случи за време на официјалната посета на македонскиот премиер на Тирана, кога беа симнати и запалени повеќе македонски знамиња. Исто така, изминатото деноноќие во тетовскиот регион настрадаа и неколку албански знамиња. Од министерствата за внатрешни работи на двете земји, најостро ги осудија овие инциденти и најавија брзо расветлување на овие немили настани.
OhridNews
