Вработените во „Утрински Весник“, кој деновиве одбележа 12 години постоење денеска ќе стапат во штрајк во знак на поддршка на десет новинари од весникот кои добија отказ. Првично, вчера, беше најавено дека поради штрајкот весникот нема да излезе од печат, но подоцна главниот и одговорен уредник Соња Крамарска за агенцијата „МИА“ изјави дека и покрај протестот „Утрински Весник’ денеска ќе излезе од печат.
Новинарите од „Утрински“ велат дека ова е само прва група отпуштања и дека крајната цел е весникот да згасне. Револтирани се што со месеци биле во неизвеснот од страв да не го изгубат работното место.
– Се планираат откази за десет, а можеби и повеќе колеги, што со оглед на тоа што сме вкупно 47 вработени, сметаме дека е најефикасен начин за брзо згаснување на весникот кој важи за критичен кон власта, изјави за „Телма“ Билјана Јовановска, претставник на новинарите во „Утрински весник“. Таа посочи дека главниот уредник не им дал поддршка и не се согласил со протестот.
Менаџментот на Медиа Принт Македонија (МПМ), сопственик на весникот, со соопштение до јавноста ги демантира наводите на новинарите и наведува дека она што тие го изнесоа на прес-конференција не соодветствува со намерите на компанијата, целите на нејзината деловна политика, како и уредувањето на весникот.
