Со богата свечена приредба подготвена од страна на учениците од сите одделенија, Основното училиште „Кочо Рацин“ од Охрид вечерва ќе го обележи својот патронен празник. Приредбата ќе се одржи во просториите на културниот центар во село Долно Лакочереј.
Во рамки на активностите за обележување на патрониот празник на училиштето деновиве се оддржа и продажна акција на честитки изработени од креативните раце на учениците. Обележувањето на училишниот патронат ќе продолжи и во понеделник на 23-ти декември кога ќе се организира ,,Отворен ден на училиштето’’. Во рамки на отворениот ден ќе биде поставен ,,Саем на училишни секции”, а ќе бидат презентирани и активности од Кампањата ,,Здрава храна за детство без мана’’.
Инаку патронот на ова училиште Кочо Рацин е роден во Велес на 22 декември 1908. Тој бил македонски книжевен деец и комунистички активист, најпознат по својата поезија. Се смета за еден од основоположниците на современата македонска литература, а неговата стихозбирка „Бели мугри“ претставува едно од најзначајните поетски дела во македонската современа литература. Го загубил животот во Лопушник, Кичевско на 13 јуни 1943 година.
OhridNews
