Според податоците на Државниот завод за статистика, најголем пораст на најчестите цени на земјоделските производи на зелените пазари во мај 2011, во споредба со истиот месец од 2010 година, се забележува кај компирите, лукот, јагодите, јаболката и лупените ореви. Компирот во мај се продавал по цена од 44 денари за килограм, речиси двојно повеќе од истиот период минатата година кога чинел 24 денари за килограм.
Најголемо намалување на цените е забележано кај краставиците, оризот и лимоните. Краставиците во мај се продавале за 31 денар за килограм, додека во истиот период лани чинеле 41 денар.
Најголемо зголемување на најчестите цени на земјоделските производи на пазарите на големо во мај 2011, во споредба со истиот месец од 2010 година, се забележува кај црвените домати, компирите, лукот, јагодите, јаболката и лупените ореви. Најголемо намалување се забележува кај оризот, зелените пиперки, гравот, краставиците, морковите и лимоните, соопшти Државниот завод за статистика.
OhridNews
