На комисиската расправа во Собранието за Законот за бранители предложен од владејачката ВМРО ДПМНЕ, што се одржа денеска, партиите од политичкиот блок на Македоницте застанаа зад предлог законот за бранители, додека партиите од политичкиот блок на Албанците излегоа со заеднички став дека ќе сторат се за да не се донесе овој закон, пренесува Тв „Телма“. Со овој закон треба да се исправи историската неправда кон бранителите. Ова е повик за национално помирување, рече Веле Ѓорѓиевски, образложувајќи ги одредбите со кои се регулираат правата на припадниците на безбедносните сили и членовите на нивните семејства. ДПА и ДУИ побараа законот да се симне од дневен ред. Барањето не беше прифатено.
-Вакви будалштини одамна не сум слушнал. Вие сакате да ја вратите атмосферата од 2001 година. Не треба да има дилема за ова прашање. Дали гледате дека албанскиот политички блок е обединет. Нема да дозволиме мајоризација на Албанците, рече Зијадин Села, ДПА.
-Ние имаме обврска да им се одолжиме на бранителите. Тргнете ги суетите. Донесовме закон за амнестија, ги амнестиравме и хашките случаи. Зошто сега правите проблем за некој кој ја бранел државата, реплицираше Веле Ѓорѓиевски.
-Ова ќе биде долга битка, но на крајот ние ќе победиме. Оваа работа нема да донесе добро,престанете со вашите кукавички и бедни постапки рече Џевад Адеми,ДУИ.
Радмила Шекеринска смета дека законот не е антилабански ниту спротивен на Рамковниот договор. За неа спорен моментот и времето во кои тој се носи.
И НДП нема да го подржи законското решение. Изет Зеќири ги повика партиите на Албанците да престанат со правењето театри и глумата дека водат грижа за борците од ОНА.
Извор:Тв Телма
