Пецаков: Имаме обврска да ги сочуваме придобивките од двата Илиндени

Во рамки на чествувањата на големиот национален празник синоќа во селото Велгошти се одржа културната манифестација „Ноќ спроти Илинден“.

Со чиста љубов и мисла се поклонивме во село Велгошти пред делото на Илинденците и Асномците кои со своите животи ги поставија темелите на современа, суверена и независна Македонија. Ноќва спроти Илинден гордо со крената глава славиме за македонскиот непокор за слобода и државност, истакна во обраќањето градоначалникот на Охрид Кирил Пецаков.

Илинден е празник кој врзува две епопеи и еден идеал, за слободна и независна Македонија. Синови и ќерки се бореа сонот за слободна Македонија да стане јаве. Двата Илиндена 1903 и 1944 година се темелите на македонската држава, јазик и идентитет. Наше е да го сочуваме наследеното, да ја осовременуваме и прилагодуваме на модерното време нашата мила татковина притоа вешто чувајќи ги нашите традиции, обичаи и култура. Да создаваме подобри услови за живот на нашите деца и идни поколенија, да не ги бркаме туку да ги вратиме дома крај родните огништа. Заедно да ја доградуваме и осовременуваме нашата Македонија. Започнавме и заедно со вас ќе продолжиме здравствено, образовно и инфраструктурно да ја усовршуваме затоа што татковината не се сака со зборови туку со дела. рече Пецаков.