Дивоградбите во Трпејца ќе се рушат кога за тоа ќе се создадат услови, односно по завршувањето на постапката околу поднесеното барање за легализација. За да покажеме ефикасност, како локална самоуправа не можеме да отстапуваме од законските прописи, затоа што тоа некој друг го направил, изјави градоначалникот Александар Петрески, коментирајќи ги случувањата околу дивоизградените објекти во село Трпејца и најавените протести и блокади на патот Охрид- Св.Наум.
– Од страна на инвеститорот поднесено е барање за легализација на дивоизградените објекти. Во овој случај не постои можност за позитивен одговор на барањето и легализација на објектите, но должни сме да почекаме да заврши законскиот рок додека надлежните институции се изјаснат и се одговори на барањето. Постапката е во тек и очекувам дека ќе заврши за десеттина дена. По тоа, она што е нелегално изградено, ќе се руши. Очигледно е дека во овој случај е направена узурпација на дел од крајбрежјето и очекувам дека сите надлежни служби заедно ќе го решиме проблемот, објасни Петрески кој кажа дека остварил веќе две средби со жителите и месната заедница на село Трпејца на кои било разговарано за проблемот.
Тој додаде дека било какви протести и блокади се непотребни и само дополнително би ги усложнале работите.
