Градоначалникот на Охрид, Александар Петрески во својот кабинет ги прими младите охридски фудбалери кои во светло издание се прикажаа на фудбалскиот Јонатан куп во Унгарија. Младинците на Охрид го освоија третото место, додека фудбалерите на Еврофудбал завршија како второпласирани во својата конкуренција.

– Ви посакувам да бидете успешни фудбалери и еден ден да го облечете дресот со македонскиот национален грб. Дека секој детски сон може да се оствари е последниот пример со српскиот тенисер Ѓоковиќ кој видовте неодамна триумфираше на Вимблдон, исполнувајќи го својот сон. Само со посветена работа може да се стигне до еден таков успех – рече Петрески.

Претставниците на охридската фудбалска школа укажаа на можноста Охрид да биде домаќин на еден таков фудбалски турнир на кој учество би зеле повеќе екипи од нашето опкружување.

– Охрид со својата околина има одлични капацитети да организира таков турнир кој би привлекол и реномирани фудбалски екипи. Идеален период за организација на таквото натпрварување би бил месец јуни, по завршувањето на школската година – истакна координаторот во школата, Данчо Целески.


“Следете го вашиот сон“ – им порача Петрески на младите фудбалери

М.Постоловски