Охридските социјалдемократи позитивно ја примија веста дека е постигнат договор за надминување на политичката криза во земјата, кој вклучува враќање во парламентот на пратениците од опозицијата и учество на локалните избори закажани за 24 март.
Позитивно расположение има и кај актуелниот градоначалник и се уште непотврден кандидат за трет мандат, Александар Петрески. Тој во изјава за OhridNews рече оти верувал во позитивна разрешница на ситуацијата.
-Јас цело време бев оптимист дека ќе се изнајде решение и дека ќе се одржат локалните избори со учество и на опозцијата и еве тоа се остварува. – изјави Петрески кој е оптимист и за исходот на претстојните локални избори.
Не помалку оптимизам има и во редовите на ВМРО ДПМНЕ во Охрид. Оттаму со став дека на избори треба да одат сите и дека сакаат политички противник за да можат граѓаните да ги споредат програмите, бидејќи, како што велат, само така може да дојде до напредок на Охрид.
-Демократијата подразбира волја на народот, а не волја на одредени поединци и групи или партии за бојкот и добро е што волјата на народот ќе биде легална и легитимна до крај. –изјавија за OhridNews од ВМРО ДПМНЕ – Охрид.
Вечерва заседава Централниот одбор на СДСМ, кој заедно со коалиционите партнери има нешто повеќе од 48 часа да ги состави и предаде кандидатските листи за учество на локалните избори на ДИК. Од ВМРО ДПМНЕ, пак, велат дека во континуитет сериозно работат на својата изборна програма и дека се подготвени да одговорат на барањата на локалните заедници.
