Актуелниот градоначалник на Охрид, Александар Петрески, кој по трет пат ќе биде кандидат на СДСМ на Локалните избори, кои ќе се одржат идната година, очекува за противник од редовите на владејачката ВМРО ДПМНЕ да добие некој од тројцата истакнати функционери: актуелниот директор на Агенцијата за стопанисување со станбен и деловен простор Цветко Грозданов, поранешниот висок полициски функционер Јордан Размоски, или актуелниот пратеник Харалампие Шокароски.
-Лично би сакал тоа да биде Цветко Грозданов и мислам дека доколку тоа се случи ќе биде многу интересно, изјави Петрески.
Без оглед кој ќе му конкурира, Петрески изрази оптимизам дека на следните локални избори ќе однесе најубедлива победа до сега, обвинувајќи ја централната власт за опструкции, кои тој очекува да ги има и понатаму.

-Јас се надевам дека овие локални избори ќе бидат нешто повеќе од локални избори и дека конечно ќе дојде до промена на централната власт која цело време како да го има заборавено Охрид, како да го опструира. Охрид во позитивна смисла треба да биде форсиран град во Македонија, а не обратно, рече Петрески.
Градоначалникот на Охрид, вели дека во изминатите два мандати реализирал многу проекти, но дека останало уште доста да се направи. Како приоретни ги издвои заложбите за изградба на автопат кон Скопје и Битола, а со преземање на ингеренциите над државното земјиште тој најави дека ќе ја реализира дамнешната идеја за изградба на ски центар на Галичица, како и современа автобуска станица и Дом за пензионери.

-Основен мотив да се кандидирам за трет мандат е реализација на сите проекти кои значат добро за градот и ќе претставуваат уште еден исчекор кон тоа Охрид да биде туристички бисер во Македонија и пошироко, додаде Петрески.
Тој им се заблагодари на сопартијците за укажаната доверба, со што, како што рече, паднале во вода разните шпекулации пласирани во јавноста во последниот период. 
-Им благодарам на поддршката на сите делегати, кои едногласно со акламација ме кандидираа и со тоа паднаа во вода сите шпекулации кои во минатиот период ги пласираа одредени медиуми, разни политичари и луѓе од градот. Јас се и сешто се изнаслушав, па сега нека се проверат сите што зборуваа, па нека видат како изгледа ситуацијата во овој момент, истакна Петрески.

Тој очекува полна поддршка и од другите опозициски партии, за кои е убеден дека ќе застанат зад неговата кандидатура.

– Разговарав со сите лидери на партиите од опозициската коалција од кои добив уверување дека ќе ме поддржат како заеднички кандидат за градоначалник, рече Петрески.
Според најавите кандидатурата на Петрески за градоначалник, ќе биде официјализирана на митинг на СДСМ што ќе се одржи во Охрид на 29-ти јули.
Владејачката ВМРО ДПМНЕ, официјално се уште не ја коментира одлуката на СДСМ по трет пат да го кандидира Петрески за градоначалник на Охрид. Лидерот и премиер Никола Груевски, вчера престојуваше во работна посета на повеќе институции во Охрид и Струга, но се воздржа од давање било какви политички изјави.
OhridNews