Во рамките на утврдената агенда за планираните предизборни активности, вчера во доцните попладневни часови кандидатот за градоначалник и кандидатите за советници од редовите на СДСМ Охрид ги посетија и остварија предизборни средби со жителите од Стар Град и Воска 1. Во директен, отворен и непосреден разговор со присутните беа презентирани приоритетите од изборната програма на СДСМ за претстојните локални избори, а се дискутираше и за сите отворени прашања и проблеми на жителите од овие две урбани  единици, како и за актуелните случувања на политичката, економската и општествената сцена во општината и во државата. На остварените средби, на присутните им се обратија кандидатот за градоначалник, г-динот Александар Петрески, како и кандидатите од листата за советници од СДСМ Охрид, кои доаѓаат од овие две урбани единици. Петрески и на двете места одговараше на бројните прашања поставени од граѓаните, со кои се задржа во подолг конструктивен разговор.


Синоќа, во просториите на ОО СДСМ Охрид, кандидатите од листата за советници од СДСМ Охрид остварија средба со претставниците од Националниот демократски институт (НДИ), како носител на проектот „ ! Не си играј со иднината – фер избори 2009“, што се спроведува во Република Македонија со заедничко учество на НДИ, Граѓанската асоцијација МОСТ, Институтот за парламентарна демократија и ОХО. На двочасовната интерактивна средба, на која беа разменети голем број размислувања, ставови, искуства и предлози, претседателот на ОО СДСМ  Охрид, г-динот Томе Чингоски го истакна големото значење на овој проект и ја изрази безрезервната и силна поддршка што ОО СДСМ Охрид ја дава на сите напори и обиди на меѓународната заедница и невладините организации да бидат организирани и спроведени фер и демократски избори. Чингоски и кандидатите за советници од СДСМ Охрид, и покрај искажаниот оправдан скептицизам во однос на декларативните заложби на Владата да организира и спроведе такви избори, уште еднаш ја потенцираа цврстата определба на СДСМ Охрид за избори  без насилство и закани, без семејно гласање, без гласање за друг и без полнење на
кутии и подмитување, како основни универзални демократски принципи, содржани во овој значаен проект.


Денес, 07.03.2009 година со почеток во 19:00 часот, на платото пред СТОБЕКС, ОИШ на СДСМ Охрид ќе одржи предизборен митинг, на кој ќе бидат претставени кандидатот за градоначалник и кандидатите за советници од советничката листа на СДСМ Охрид. На присутните граѓани од овој дел на Охрид ќе им се обратат г-дин Александар Петрески, кандидат за градоначалник и г-дин Бранислав Трпчески, носител на советничката листа од СДСМ Охрид. На оваа јавна трибина пред ѓраѓаните ќе бидат изложени основните одредби од изборната програма на СДСМ  за претстојните локални избори.