Кампањата што ја водам е позитивна и никаде немам речено ниту еден лош збор за политичките противкандидати, а тие зборуваат и работат негативно – изјави кандидатот за градоначалник на СДСМ, Александар Петрески. Тој рече дека она што е направено во изминатите 4 години, како и долгот на општината што е вратен, го немаат направено сите градоначалници на ВМРО ДПМНЕ заедно.
„Ме обвинуваат сум направил повеќе во периферијата, а не во центарот. Сите граѓани заслужуваат подеднакво добар живот“, додаде Петрески.
Зборувајќи за обвинувањата дека немал реализирано капитални инвестиции, Петрески подвлече дека Владата била задолжена за таквите инвестиции и запраша каде се хотелот „Хилтон“ и двата најавувани хотелски капацитети на местото од детската болница кои ги најавуви владата.
Петрески рече дека ВМРО ДПМНЕ е изгубена во простор и време и ја обвини владејачката партија дека во време на економска криза во Македонија, таа за митингот во Охрид потрошила неколку стотини илјади евра.
На Петрески денеска му беше врачена икона со ликот на Св. Богородица изработена од Пецо Трајаноски. Петрески рече дека и пред 4 години на почетокот на кампањата Трајаноски му врачил икона со Св. Климент со која му посакал успех во изборната трка.
