По една година затвор за капетанот на „Илинден“ и овластениот претставник на германски „Лојд“

Судскиот совет при основниот Суд во Охрид, предводен од судијката Милка Танеска, ги прогласи за виновни капетанот на бродот „Илинден“ Сотир Филески и овластениот претставник на германски „Лојд“ Бранко Баиќ и ги осуди на по една година затвор. Според судот тие се виновни за предизвикување тешки дела против луѓето и имотот во сообраќајот и дека со своето несовесно работење придонеле на 5-ти септември 2009 година да се случи несреќа на бродот „Илинден“ кој потпона во водите на Охридското Езеро на околу 350 метри од авто кампот Елешец, при што животот го загубија 15 туристи од Бугарија.

Во казната на капетанот Филески му се пресметува и времето поминато во затворски и домашен притвор од 05.09 2009 до 04.12 2009 година.

Судот ги задолжи осудените солидарно да ги надоместат кривичните штети во висина од 2.537.160 денари, како и да ги обештетат оштетените во случајот во рок од 15 дена.

Според пресудата прво обвинетиот го прекршил законот и прописите за внатрешна пловидба, заради тоа што не го одржувал соодветно системот за управување, а критичниот ден на бродот имало повеќе патници од дозволеното на пловниот објект кои не биле правилно распоредени и дел од нив биле сместени на дополнително изградената горна палуба на која не смеело да се превезуваат патници. Исто така немал обезбедено екипаж соодветен за тој тип на брод. Второ обвинетиот е виновен затоа што издал сертификат за техничка исправност на бродот „Илинден“ и покрај техничките недостатоци на истиот и не изрекол забрана за употреба на надградбата на пловниот објект, како и ограничување за бројот на патници кои можело да се превезуваат.

По завршување на судскиот процес, капетанот Филески изјави дека не се чувствува виновен, но за други детали поврзани со правната постапка упати на неговите адвокати, кои не присуствуваа на соопштувањето на пресудата.

Славко Котески, адвокат на второ обвинетиот Бранко Баиќ кому му се судеше во отсуство, изрази незадоволство од одлуката на судот, без оглед како што рече, што висината на казната е ниска. „Имаме впечаток дека се работи за компромис помеѓу изведените докази и некоја намера или желба да се изрече ослободителна пресуда за обвинетиот Бранко Баиќ“, рече адвокатот Славко Котески.

Адвокатот на семејствата на загинатите бугарски туристи, Мартин Петров, истакна дека оштетните побарувања ќе бидат истакнати по добивање на одлуката на писмено и не ја прецизираше нивната висина.