Од денеска до вторник (25 јуни до 15 часот) ќе се спроведува првото електронско пријавување на учениците за запишување во средно образование за учебната 2024/2025 година. Второто пријавување во јунскиот уписен рок ќе биде на 1 и 2 јули до 15 часот.

Според објавениот Конкурс на Министерството за образование и наука (МОН) во четирите охридските средни училишта има слободни места за упис на 851 ученик.

Во ОСУ „Свети Климент Охридски“ слободни има 272 места во прва година ќе се запишат 272 ученици во 8 паралелки со настава на македонски јазик во гимназиско образование.  Во СОСУ „Свети Кирил и Методиј“ ќе може да се запишат 152 ученици во 5 паралелки со настава на македонски јазик. Од нив 118 во економско-правната и трговска струка и 34 во здравствената струка. Во ОЕМУЦ „Св. Наум Охридски“ во 10 паралелки со настава на македонски јазик има слободни места за упис на 277 ученици. Од нив во машинска струка – 84 ученици, електротехничка струка – 143 ученици, лични услуги – 25 ученици и сообраќајна струка – 25 ученици. 150 ученици во 6 паралелки со настава на македонски јазик ќе може да се запишат во РЦСОО „Ванчо Питошески“ во угостителско- туристичка струка, се наведува во Конкурсот.

Со цел да се оптимизира процесот за запишување во средните училишта, Министерството за образование и наука и оваа година овозможи електронско аплицирање. Пријавувањето е преку линк до порталот за електронски услуги на МОН (https://e-uslugi.mon.gov.mk) со специјална најава за средношколци преку сопствените кориснички сметки на schools.mk.

Од МОН појаснија дека регистрација на системот нема да биде потребна и најавата ќе се врши исклучиво со корисничките сметки на schools.mk.

Упатството за логирање/најава во системот и пополнување на пријавата ќе биде поставено со линк на страната за логирање/ најава, посочи МОН.

На крајот на март МОН го објави Конкурсот за запишување ученици во јавните средни училишта за учебната 2024/2025 година. Во него се наведени потребните документи, начинот на аплицирање и конкурсните рокови.

Конечната ранг-листа со резултатите од запишувањето и слободните места по првото пријавување, секое училиште треба да ја објави на 26 јуни најдоцна до 9 часот, на јавно место во училиштето и/или на училишната интернет-страница.

Во училиштата каде што ќе има квалификациско тестирање ќе се организира на 28 јуни, а конечните ранг-листи со резултатите ќе бидат објавени на 28 јуни на јавно место во училиштето.

OhridNews