Со цел фирмите да го запазат крајниот рок, 15 февуари, за поднесување на Годишни извештаи, канцелариите на Управата за јавни приходи во наредните денови ќе работат со продолжено работно време, односно до 18 часот, информираат од УЈП.
Обврска да поднесат годишен извештај имаат правните лица, трговец-поединец, занаетчииите, лица кои вршат слободни занимања и други кои во изминатата 2011 година извршиле исплата на приходи на физички лица.
Фирмите до 15 февруари треба на граѓаните да им издадат пресметка за исплатените приходи, платениот персонален данок и придонеси во 2011 година. Врз основа на издадените пресметки, граѓанинот како обврзник на персоналниот данок на доход, ќе може точно и навремено да ги пријави приходите во Годишната даночна пријава.
Доколку до 15 февруари, економските субјекти не поднесат годишен извештај за исплатените приходи, како и на граѓанинот не му издадат збирна пресметка за 2011 година, законот предвидува глоба во износ од 2.000 до 3.000 евра во денарска противвредност, а за направениот прекршок на одговорното лице на фирмата, ќе му биде изречена глоба во износ од 750 евра во денарска противредност.
Според податоците од УЈП досега годишни извештаи поднеле 14.770 фирми, а се очекува да пристигнат уште 50 илјади.
