Поради оштетување на мост на планинскиот премин Стража и воведената забрана за движење на возила потешки од 7,5 тони, ќе дојде до промена во маршутата на автобусите на најголемиот авто превозник во регионот А.Д.„Галеб“ кои сообраќаат за Скопје. Од „Галеб„ информираат дека го задржуваат редовниот возен ред и линии кон и од главниот град, но наместо преку Кичево, автобусите ќе сообраќаат преку Дебар од страната на Струга.
Поради изнудената промена, патувањето од Охрид до Скопје со автобус се очекува да се пролонгира од 20 минути до половина час, велат од „Галеб“.
Според најавите, оштетувањето на мостот на Стража се очекува да биде санирано за десетина дена, период во кој автобусите на „Галеб“ за Скопје ќе сообраќаат по алтернативен пат, односно преку Дебар. За секоја промена, јавноста навремено ќе биде информирана, додаваат од „Галеб“.
Како што веќе информиравме, патот од Стража кон Гостивар и обратно, попладнево е затворен за сообраќај за товарни возила, чија тежина надминува седум и пол тони.
Од „Македонија пат“ информират дека причина за затворање на патот е оштетување на мостот во близина на селото Церово.
